Pamahalaang Lungsod ng Calapan, ISO Certified Na!

LUNGSOD KAHANAY NA NG IILANG MAY PANG-INTERNASYUNAL NA KALIDAD NG PAGLILINGKOD

Isang malaking karangalan para sa Lungsod ng  Calapan ang natanggap na sertipikasyon ng Pamahalaang Lungsod noong ika-29 ng Hunyo 2010 na nagpapatunay sa pagkakaroon nito ng quality management system na pumasa sa pamantayan na hinihingi ng  Certification International Philippines Inc. (CIPI).

Ang International Organization for Standardization o ISO ay isang organisasyon na naglalaan ng mga batayan kung ang pamamahala ng isang unit ay maayos at maaari sa internasyonal na lebel. Nagpapairal ito ng mga international standards na kinakailangan para sa pagkakaroon ng quality management system sa isang organisasyon o opisina.  Layunin nitong mas higit na mapaganda at mapalawig ang customer satisfaction sa pamamagitan ng paglalahad ng continual improvements na sasagot sa pangangailangan ng mga kliyente at gayondin sa organisasyong kinabibilangan.

Ang sakop ng ISO 9001:2008 Quality Management System Certification na ipinagkaloob sa Pamahalaang Lungsod ng Calapan ng CIPI ay ang mga sumusunod: (1) issuance of business permits and other clearances; (2) appraisal and assessment of real property and issuance of true copies of tax declaration and other certificates; (3) registration and issuance of certifications of birth, marriage and death. Matatandaan na walong departamento ng city government ang sumailalim sa masusing pagsasanay na tumagal ng limang buwan at nakapag-sumite ng isang quality manual para sa umiiral na implementasyon ng mga nabanggit na scope of activities.

Bagama’t naging mahirap para sa mga lumahok na empleyado ang mga nakaraang buwan upang masiguro na magagawaran ang Calapan ng sertipikasyon, alam ng lahat na mas malaking hamon ang mapanatiling sang-ayon sa pamantayan ng ISO ang paraan ng paglilingkod ng mga kawani ng pamahalaang lungsod sa araw-araw.

Ikinagalak naman ni Mayor Doy Leachon ang magandang tagumpay ng lungsod na natanggap.  Aniya, malaki ang kanyang pangarap para sa tuluyang ikakaganda ng Lungsod ng Calapan.  Sa nakita niyang sama-samang pagtutulungan at nagkakaisang magandang hangarin na makapag-bigay ng de kalidad na serbisyo publiko sa mga Calapeño, hindi malayong makamit ang inaasam na ANG BAGONG CALAPAN.

Ayon naman sa panayam kay City Registrar Nelly Asturias na itinalagang Quality Management Representative, sasailalim muli ang Pamahalaang Lungsod sa anim na surveillance audit upang masiguro na namimintina ang magandang klase ng serbisyo na nakasaad sa manual na kanilang isinumite.  Dagdag pa niya, nasa walong Local Government Units o government agencies lamang sa bansa ang nabigyan ng ganitong rekognisyon.

Para sa isang maliit na lungsod na tulad ng Calapan, isang malaking karangalan ang mapabilang sa hanay ng mga magagaling at mahuhusay magbigay ng serbisyo sa buong mundo.

Tags: calapan, ISO Certification